Dahong Laya kalaay | kalipay | kasakit | kaguol

The Old Houses of Carcar

Charter day sa Cebu ug walay klase ang mga tunghaan, ug gatuo 'ko nga mag tanga ra tibuok adlaw sa balay.  Maayo nalang og naka huna-huna og laag ang akong mga higala.  Unang plano kay musuroy unta didto sa Danao apan sa wa damha nagkasinabot 'sab nga muadto nalang sa Carcar kay mura'g duol-duol itandi sa Danao.

Alas tres sa hapon kami mibiya gikan sa Cebu South Terminal.  Sa tinudanay lang, mao pa to ang unang higayon nga misulod ako sa mao nga terminal sukad sa pag renovate niini.  Mura na kini og airport.  Dili na alimuot kay lagi aduna nay mga aircon nga nakabutang sa palibot.  Hapsay na kini ug dili na gubot ug samok sama sa una.

Sa pag abot na namo sa Carcar kay wala gyud 'mi mahibaw unsa among unang buhaton.  Maayo nalang og nakadisidar among usa ka higala nga muadto sa St. Catherines Church, usa sa mga karaan nga simbahan dinhi sa Sugbo.  Kilid sa mao nga simbahan nahimutang pud ang St. Catherines School.

Sa di pa ka maabot sa mao nga simbahan ug tunghaan malabyan nimo ang Carcar Museum. Didto nahimutang ang mga karaan nga gamit sama sa galingan, makina pang tahi, ug uban pa.  Apan ang naka pa lingaw nako sa maong pagsuroy sa Carcar Museum kay ang mga karaan nga kopya sa The Freeman newspaper ug ang suwat ni Gen. Emilio Aguinaldo.  Sayang lang kay di nako maipakita ninyo kay tungod lagi dili pwede manguha og hulagway sulod sa mao nga museo.

Human sa pag-suroy namo sa simbahan ug museo sa mao nga lugar, nag huna-huna kami kung unsa ang unahon: ang kaon kay lagi gutom na 'mi o ang pag suroy sa mga karaan nga balay.  Ug nakadisidar na kami...unahon ang kaon. HAHAHA.  Gi-una namo ang pag pangaon aron mahilisan pud kami sa paagi nga mag lakaw-lakaw sa mao nga ciudad.

Nagpahatud mi sa Choppy Cab, mao kana ang means of transportation sa ciudad sa Carcar, didto paingon sa ilang merkado kung asa nahimutang ang mga tindahan nga namaligya og hilamian kaayo nga lechon.

Sa dihang nahuman na kami og lawg sa among mga bitok, nagpahatud na 'sab kami paingon sa Balay na Tisa, ang usa sa hilabihang karaan nga balay dinhi sa Pilipinas.  Di lang ingon mao ra kana ang karaan nga balay, murag usa gyud ka dalan naglaray ang mga karaan nga balay.

Human namo og suroy sa mga karaan nga balay, milakaw nalang kami paingon sa ilang rotonda kung diin didto kami mipahulay sa makadiyot pagpangandam sa amo pagbalik sa Cebu City