Dahong Laya kalaay | kalipay | kasakit | kaguol

Ania napud sila!

Septyembre na ug hapit na ang gipaabot sa tanan...ang pasko, ug tungod niini nagsugod napud ang pag pamasko sa atong mga kaigsuonan.  Wala may supak sa pag pamasko, apan kung kini sa sulod na sa jeep pagabuhaton sakto pa ba kaha na?

Kapila na ka nakasuwawy og sakay'g jeep nga kung muagi na sa may eskina N. Bacalso ug SRP aduna lang kalit mukapyot?  Usahay tulo ni sila kabuok pero kasagaran duha ra gyud ni sila kabuok: ang usa musulod sa jeep, kung puno ang jeep magpungko ni siya sa tunga, ang usa sab kay mukapyot.  Dayon kantahan ka og "kasadya ning taknaa" nga usahay sagolan pa og kinomedya nga dili ka magkatawa. Apan una pa nila sugdan ang ilang pagpanaygon mu bat-bat dayon ni sila nga daw "latin" sa mga manaygonay sa jeep.  "Ate, kuya, mam ug sir, ayaw lang mo pag huna-huna og dautan ha, mamasko ra mi."

Ako mismo kay makulbaan sa mga panahon nga musampa na sila sa jeep.  Ang ilang porma nalang daan og pagposisyon sa jeep daw sama sa mga tulisan: ang usa sa sulod nga maoy magbuhat sa pagpanulis samtang ang usa nga nagkapyot daw mao ang cover sa krimen nga gibuhat. Makita gyud nimo sa mga nawng sa pasajero ang kabalaka kung musakay na kining mga tawhana. Mapugos nalang ang uban sa paghatag aron munaog na kining mga tawhana.  Kay kani sila dugay kaayo munaog kung wala pay makuha gikan sa mga pasajero.

Ang pangutana!

Gi-implementar pa ba gihapon sa ang balaod nga anti-mendicancy sa kadalanan sa panahon sa umaabot nga pasko? Di ba nga wala gitugotan sa CITOM ang pagkapyot sa mga pasajeroan sama sa jeep? Bisan ang mga konduktor kung makakita sa CITOM  nga nag atang sa unahan musulod man gani sa jeep kay hadlok madakpan.  Apan wala sila makabadlong aning mga mamaskohay nga mukapyot sa jeep. Kanusa pa sila mamadlong? Kanang naa nay mabalita sa telebisyon, radyo ug sa mga mantalaan nga adunay natulis sa mga manaygonay sulod sa jeep? Pagka!