Wala ko damha nga maabot na usab ako sa mao nga dapit. Sa ako nahinumduman, duha na ka tuig ang milabay una ko naka bisita sa mao nga lugar apan dili sa pag laag-laag kung dili sa pag-duyog sa usa ka banda. Naabot lang ako og balik sa Cordova tungod kay medyo laay ang kahaponon ato nga adlaw ug medyo gikapoy pa tungod sa kadaghan sa buhatonon buntag sa mao gihapon nga adlaw.
Charter day sa Cebu ug walay klase ang mga tunghaan, ug gatuo ‘ko nga mag tanga ra tibuok adlaw sa balay. Maayo nalang og naka huna-huna og laag ang akong mga higala. Unang plano kay musuroy unta didto sa Danao apan sa wa damha nagkasinabot ‘sab nga muadto nalang sa Carcar kay mura’g duol-duol itandi sa Danao.
Alas tres sa hapon kami mibiya gikan sa Cebu South Terminal. Sa tinudanay lang, mao pa to ang unang higayon nga misulod ako sa mao nga terminal sukad sa pag renovate niini. Mura na kini og airport. Dili na alimuot kay lagi aduna nay mga aircon nga nakabutang sa palibot. Hapsay na kini ug dili na gubot ug samok sama sa una.
